ScotNepal: भूकम्पपीडित च्यातिएको पालमुनि छन् , सांसदको भत्ता बढाउन लाज लाग्दैन ?
Loading...
भूकम्पपीडित च्यातिएको पालमुनि छन् , सांसदको भत्ता बढाउन लाज लाग्दैन ?

धनराज गुरुङ

बीपीले प्रधानमन्त्रीको तलब २५ सयबाट १५ सय र मन्त्रीको तलब १५ सयबाट एक हजारमा झार्नुभयो

मैले केही दिन पहिले बजेटमाथिको छलफलका क्रममा भूकम्पीडितहरू पालमुनि बसिरहेको अवस्थामा सांसदको तलब, भत्ता र घरभाडा बढाउने कुराको विरोध गरेको थिएँ । भूकम्पपीडितहरू च्यात्तिएको पालमुनि कष्टकर जीवन बिताइरहँदा र जीवन गुजारा गर्न धौधौ भइरहेको समयमा सांसदहरूको तलबभत्ता बढाउने कुरा लाजमर्दो विषय बनेको छ ।
भूकम्प गएको एक वर्ष बितिसक्दा पनि भूकम्पपीडितको अवस्था हेर्दा आफूलाई नेता हँु भन्न पनि लाज लाग्ने भएको छ । मुलुक यतिसारै अप्ठेरो अवस्थामा छ र यस्तो अवस्थामा जनताका सेवक हामीले कर्मचारीले जस्तै तलब बढाउन मिल्छ ? नेता भनेको जनताको अभिभावक हो । जसरी बा आमाले आफू भोकै भएर पनि बालबच्चालाई खुवाउँछ, नेताहरूले पनि पहिले जनताको बन्दोबस्त गर्नुपर्ने हो । तर यस्तो बेलामा तलबभत्ता वृद्धि गरेर, मोजमस्तीतर्फ उन्मुख हुने तर जनताप्रति अनुत्तरदायी हुने कहाँसम्म उचित छ ? यो जनता र देशप्रतिको बेइमानी होइन ?

बीपीले मन्त्रीको तलब घटाउनुभयो
यस्तो बेला सांसद र मन्त्रीको तलब भत्ता र घरभाडा वृद्धिको कुराले मलाई पीडाबोध भइरहेको छ । राजनीति भनेको जनताप्रतिको सेवाभाव हो, राजनीतिमा लागेबापत भाग खाने होइन नि । बरु आफ्नो निजी स्वार्थका लागि लागि त व्यापार व्यवसाय गर्दा हुन्छ । देश र जनताप्रति समर्पित नेताले तलबभत्ता बढाउने कुरा लाजमर्दो हो । बीपी कोइरालाले २०१६ सालमा प्रधानमन्त्री बन्दा २५ सयबाट १५ सयमा प्रधानमन्त्रीको तलब झार्नुभएको थियो ।
उहाँले मन्त्रीको तलब १५ सयबाट एक हजारमा झार्नुभएको थियो । अहिले देशको अवस्था २०१६ सालमा भन्दा पनि बढी बिग्रेको छ । देशको यस्तो भयावह अवस्थामा सांसद र मन्त्रीको तलब भत्ता र घरभाडा वृद्धि गर्ने कुरा सोच्दा पनि लाज लागेर आउँछ । योभन्दा नालायाकी केही हुन्न भन्ने मेरो ठम्याइ हो । यही कुरा संसदमा बोलँे र तपाईंसँग पनि भन्दैछु । मुलुक खराब अवस्थामा छ र आर्थिक अवस्थाका कारण मुलक यति बिघ्न अप्ठ्यारोमा परेको सम्भवत यो पहिलो पटक होला । यस्तो बेला आफँै तलब सुविधा वृद्धि गर्न सरकारले जाल मान्नुपर्ने हो । तर सत्तामा हालीमुहाली गरिरहेकाहरू जनतासँग लाज मान्न छाडेका छन् ।
राजनीति सेवाका लागि कि मेवाका लागि ?
कांग्रेस, एमाले, माओवादी वा मधेसवादी दलका नेताहरू मन्त्री बन्नासाथ कमिसन कहाँबाट आउँछ भनेर कमिसनको झ्याल ढोका रुँगेर बस्ने प्रवृत्तिले देशलाई बेहाल बनायो । यसरी कहिल्यै देश बन्छ ? मैले हरेकपल्ट भन्ने गरेको छु, संसद र लेखा समितिमा भनेको छु । भ्रष्टाचारीको जात, धर्म र लिंग हुदैन भनेर राजनीतिक पार्टी हुँदैन । भष्टाचारीका विरुद्धमा उन्मुक्ति दिने काम गर्नु हँुदैन । पार्टीको जातको मिल्यो भन्दैमा उन्मुक्ति दिनु हुँदैन ।
राज्यको नेतृत्वमा पुगेकाहरू राज्यकोषमा चरम दोहन गरिरहेका छन्, कुशासनमा लिप्त छन् । सरकार सञ्चालकहरूको यस्तै कार्यशैलीले देश अफ्रिकी मुलुक हाइटी जस्तै बन्दैछ । हाइटीमा २००१ मा भूकम्प गयो । खर्बौं रुपैया वैदेशिक सहयोग आयो तर जनताको बेहाल उस्तै छ । नेपालमा ठ्याक्कै त्यस्तै भयो । भूकम्पपीडितका नाममा विदेशी सहयोग आएको आयै छ, तर बालुवामा पानी खन्याए जस्तो भएको छ ।
हामी हाइटीकै बाटोमा हिँडिरहेका छौँ । राजनीति आफ्नो लागि होइन, देश र जनताको लागि हो भन्ने मन मस्तिष्कमा रह्यो भने देशलाई सुशासन र समृद्धि दिन सक्छौँ । सरकारका मन्त्रीको हालीमुहाली देख्दा राजनीतिप्रति नै विरक्त लाग्छ । मन्त्रीहरुले कमिसनका लागि आफैँ फाइल अड्काएर राख्ने प्रवृत्ति हावी छ । हाम्रो पुस्ता पनि त्यही बाटोमा लाग्यो भने मुलुक बिग्रिने पक्का छ । डरलाग्दो कुरा, अहिले विद्यार्थी राजनीतिमा लागेकाहरूमा पैसा माग्ने बानी परेको छ ।
भोलि ऊनीहरू मन्त्री बन्दा के होला ? नयाँ पुस्ता पनि कुबाटोमा लागेको देख्दैछु । राजनीति सपार्नको लागि हामीले उद्यमशीलता र राजनीतिलाई सँगै लैजानुपर्ने भएको छ ।
सय कमाएर हजार खर्च
कम्युनिष्टहरू बाहुल्यता भएको सरकारले ल्याएको बजेट सुन्नका लागि कर्णप्रिय छ । फाष्ट ट्रयाक, विमानस्थल बनाउने, जलविद्युत् योजना बनाउने कृषिलाई अनुदानका कुरा सुन्नका लागि अत्यन्त कर्णप्रिय छन् तर त्यसको स्रोत के हो ? ६ खर्ब १७ अर्ब चालु खर्चका लागि छुट्याइएको छ जुन तलब भत्तामा खर्च गर्ने हो जबकि चालु खर्चभन्दा कम ५ खर्ब ६५ अर्ब रुपियाँ मात्र राजस्व उठाउने अनुमान छ । त्यो तलब भत्तालाई पनि अपुग हुने हो । चालु बर्षकोले तलब भत्ता त पुग्ला तर
विकास खर्च कहाँबाट ल्याउने ?
विकासको लागि वैदेशिक सहयोग र ऋणको कुरा छ । एक खर्ब ९५ अर्ब वैदेशिक ऋण माग्ने, १ खर्ब ६ अर्ब अनुदान भनेका छौँ । अब विकासका लागि विदेशीको ऋणमा भरमा पर्ने भयौँ । विदेशीले दिएन भने हाम्रो विकास नहुने भयो । ‘तिमीहरू आन्तरिक स्रोतले भुँडी भर्ने, विकासका लागि हामीले अनुदान दिनुपर्ने’ भनेर विदेशीले सोधे भने सरकारका मन्त्रीले के जवाफ देलान् ? विदेशीले दिएन बने बजेट आकाशको फल आँखा तरी मर् जस्तै हुने भयो ।
प्रचण्डको चलखेल
बजेटको पूर्वसन्ध्यामा एमाओवादीका अध्यक्ष प्रचण्डले प्रधानमन्त्री बन्न जुन चलखेल गर्नुभयो त्यसैको प्रतिफल बजेटमा प्रतिबिम्बित भएजस्तो देखिन्छ । प्रधानमन्त्री केपी ओलीलाई के प¥यो भने, यसै प्रधानमन्त्री छाड्नु परेपछि किन नबाँड्ने ? चुनावमा प्रभाव पार्नका लागि बजेट बाँडियो र छरियो । त्यहीबेला भद्र सहमतिको कुरा र सत्ता हस्तान्तरणको कुरा भयो । बजेट कार्यान्वयन गर्नु नपर्ने भएपछि सस्तो लोकप्रियताका लागि बजेट छरियो ।
मुलुक सञ्चालकहरूको यस्तै गैरजिम्मेवारी र लापरबाहीका कारण मुलुक एक दुई वर्षमा झन् झन् टाट पल्टिने खतरा बढ्दैछ । देशको अवस्थाप्रति हामी राजनीतिकर्मी गम्भीर बनेनौँ । राज्यको नेतृत्व लिएकाहरू निजी स्वार्थमा फँसे र सस्तो लोकप्रियता कमाउनतर्फ लागे । त्यसैकारण देशको बेहाल भयो ।
देशको यस्तो भयावह अवस्था आउनुमा कांग्रेसको पनि केही जिम्मेवारी होला । अहिले सत्तापक्ष कुम्भकर्णको निद्रामा परेको छ भने प्रतिपक्ष निद्रामा रहेको सत्तापक्ष कहिले ब्युँतिन्छ भनेर कुरेर बसिरहेको छ । एक प्रकारले भन्दा प्रतिपक्षको भूमिका शून्य जस्तै छ । राज्यले नागरिकका लागि ‘डेलिभरी’ दिन नसकेको अवस्था छ । पुनर्निर्माणको महाभियान भन्ने गरेपनि अभियान शुरु गर्न सकेको छैन । कालोबजारी मौलाएको यस्तो अवस्थामा प्रतिपक्षले सडक र सदन सदुपयोग गर्नुपर्ने हो तर प्रतिपक्ष पनि मौन बसेको छ ।
महतले नेपालको माटो चिन्नुभएन
नेपाली कांग्रेसबाट डा. रामशरण महत पटकपटक मन्त्री बन्नुभयो, एकपटक होइन ६ पटकसम्म । लामो समय अर्थमन्त्री बन्दा उहाँले देशमा पुँजी वृद्धिका लागि केही गर्नुभयो, तर नेपालको माटो चिन्नुभएन । नेपालीपना, नेपालको माटो, नेपालको अवस्थाबाट कसरी अगाडि बढाउन सकिन्छ भन्ने चिन्नुभएन ।
सदनमा मैले धेरैपटक भनिसकेको छु, नेपालका अर्थमन्त्रीलाई विदेशीको मुख ताक्ने बानी परिसक्यो । आफ्नो देशको क्षमता देख्दै नदेख्ने, मृगले नाभिको कस्तूरी सँुघ्न भौंतारिएझैँ भौंतारिने नेपालका अर्थमन्त्री । त्यसै भएर त हो देश बिग्रेको । हाम्रो देश भगवानले पनि दिएको र प्रकृतिले पनि बनाइदिएको थियो । तर देशका नेता दूरगामी बन्न सकेनन् । त्यसैले देशको यो दुर्दशा भयो ।
(नेपाली कांग्रेसका केन्द्रीय सदस्य एवं सांसद गुरुङसँग लोकान्तरले गरेको कुराकानीमा आधारित, २०७३, जेठ २४ गते प्रकाशित/पुनःपोष्ट : असोज १४ २०७३ )
- लोकान्तर बाट 
Loading...
Recent Updates

, , ,
Show Comments: OR

नेपाली भित्र रहेका रोचक भिडियो हरु !! एक चोटी हेरे पछी जाम जाम लाग्ने छ !!

About Us

Online News & Entertainment Nepali Online Portal : Nepal News, News from Nepal, Articles, Videos, Jokes Bizarre world, Life Style, Sports, Development, Video, Features, Business reviews and Many more ...










Search This Site

Our Team

Correspondent
Subish Adhikari (Kathmandu), Rabilal Paudel (Gulmi)

Country Representative
Ganesh Karki (Norway)
Tika Adhikari (UK) ,
Sunil Shrestha (Israel)

Media Editor
Tika Aadhikari


Founder
Tika Adhikari (UK)
44-7828905018

Total Pageviews

Contact Us - सम्पर्क


स्कटनेपाल मिडिया हाउस प्रा. लि. द्धारा सन्चालित
(ScotNepal Media House Pvt. Ltd.)
scotnepal.com
Maitidevi-33, Kathmandu, Nepal
Call: 9857025142
News Desk
Email: admin@scotnepal.com

Marketing
Email: admin@scotnepal.com

Google+ Followers